Alle Johr gibt’s des Gewimmer:
Die Studende suche Zimmer.
Des is verständlich aa mitunner
bei dene Aasprich gar kää Wunner.
E Bud mit Schlossblick un Terrass,
die Kneip un Disco in de Gass,
schää drum rum die Uni-Welt,
per Fahrrad naus ins Nei’mer Feld.
In de Altstadt muss se ligge,
ma will aa uff de Negger bligge
un Schiffl fahre mit de Braut
bis hie wo ma de Negger gstaut.
En Stadtteil is net indressant,
ma hot net alles bei de Hand.
Ich hab e Bude hergericht’t,
als Bürger fiehlt ma sich verpflicht’t.
Schare kumme aaspaziert,
alles werd do inspiziert,
ob die Dusch un Heizung geht,
ob des Bett schää weich un breet.
‚s is alles do: Gscherr, Tepf un Pann,
e naggelneiji Badewann,
grad sechs Minudde zume Bus-
un des womeeglich noch zu Fuß?!
Irma Springer
08.10.03